You are here

Majburiy sug'urta bo'yicha 44 mingdan ziyod sug'urta polislari berildi

2008 yilning  24 aprelida  mamlakatimizda «Transport egalarining fuqarolik javobgarligini majburiy sugurta  qilish» to'g'risidagi qonun qabul qilingan. Aynan o'sha yili Vazirlar Mahkamasi  qarori bilan   ushbu sug'urtani amalga oshirish qoidalari ishlab  chiqilib, tasdiqlangan.  Ayni paytda,  «O'zbekinvest» eksport-import milliy sug'urta kompaniyasi (EIMSK) tomonidan   transport egalarining  fuqarolik javobgarligi majburiy sug'urtasi  bo'yicha muayyan ishlar amalga oshirilmoqda.

Sugurta shartnomasiga  asosan transport vositasidan foydalanishda uchinchi shaxslarning hayoti, sog'lig'i va mol-mulkiga zarar yetkazilishi natijasida yuzaga kelishi mumkin bulgan fuqarolik javobgarligi sug'urta qilinadi.  Shu yilning dastlakbi 6 oyida  «O'zbekinvest» sug'urta  kompaniyasi tomonidan ushbu sug'urta turi buyicha 44 mingdan ziyod sug'urta polislari  mijozlarga berilgan.  Yig'ilgan sug'urta mukofotlari esa  1 mlrd. 700 mln. so'mni tashkil qiladi. Kompaniya tomonidan olingan majburiyatlar summasi 300 mlrd. so'mga teng.

- Ushbu sug'urta turi  fuqarolarni ijtimoiy himoya qilishga qaratilgan bg'lib, unga ko'ra sug'urtalanuvchi o'z javobgarligini sug'urta qiladi, - deydi   “O'zbekinvest” EIMSK Majburiy sug'urta turlari departamenti katta anderayteri Saidolimxon Nuriddinov. -   Bu degani, transport hodisasi ro'y berganda sug'urtalangan shaxs aybdor bo'lib qolgan taqdirda, jabrlanuvchi oldidagi  javobgarligini  sug'urta qilib qo'yadi.

Biroq, ko'pchilik  haligacha  mashinamni sug'urta qildirdim va sug'urta hodisasi yuz berganda  kompaniya  sug'urta  to'lovini menga  to'lab beradi, deb o'ylaydi.  Yo'q, qoplama jabrlanuvchiga to'lanadi.   Sug'urta puli 3000 AQSh dollari ekvivalentida, sug'urta shartnomasini tuzish kunidagi Markaziy bankning so'mga nisbatan kursida hisoblanadi.  Shundan, qoplamaning  35 foizigacha  mol-mulkka ziyon yetganda, 65  foizi esa  inson hayoti, sog'lig'iga  zarar yetganda qoplab beriladi.

- Sug'urta hodisasi ro'y bergandan keyin DAN xodimi chaqiriladi va  u  kim aybdorligini aniqlab, xulosa chiqarib beradi,  –  deya qo'shimcha qildi Saidolimxon Nuriddinov. -  Keyin jabrlanuvchiga yetkazilgan zarar baholanadi.  Shundan so'ng,  sug'urta kompaniyasiga murojaat qilinadi.  Agar bahsli bo'lsa, unda sud qarori kutiladi.

Shu o'rinda, sug'urta qoplamasi qacha muddatda  to'lab beriladi, degan savol tug'iladi?

- Barcha hujjatlar taqdim etilgandan so'ng, ichki komissiya ularni ko'rib chiqadi va 10 kun ichida mablag'  jabrlanuvchining hisob raqamiga o'tkazib beriladi, – deydi  Saidolimxon Nuriddinov.  

Ayni paytda, «O'zbekinvest» sug'urta kompaniyasi mijozlarga qulayliklar yaratish maqsadida,  agentlar sonini  ko'paytirishga katta e'tibor qaratmoqda.   O'zbekiston fuqarosi bo'lmagan shaxslarga ham vaqtinchalik polislar  beriladi.  Sug'urta polisining amal qilish muddati  - 1 yil. Transport vositasidan vaqtincha foydalanilganda eng kamida 15 kun va mavsumiy foydalanilganda kamida  6 oyga polis beriladi.