«O'zbekiston havo yo'llari» milliy aviakompaniyasi tomonidan  havo laynerlari va aviakompaniya majburiyatini sug'urtalash bo'yicha o'tkazilgan  ochiq tender g'olibi nomi e'lon qilindi.  Unga ko'ra, ushbu tenderda  “O'zbekinvest” EIMSK kompaniyasi  g'olib bo'lib,  milliy aviakompaniyaga sug'urta  xizmatlarini ko'rsatadigan bo'ldi. 

Tender o'z ichiga  32 ta  havo layneri sug'urtasi va kompaniya majburiyatini  oladi. Unga muvofiq,  “O'zbekinvest” EIMSK va  “O'zbekiston havo yo'llari”  milliy aviakompaniyasi o'rtasida  aviatsiya sug'urtasi bo'yicha kelishuv imzolandi hamda sug'urta kompaniyasi tomonidan  kerakli sug'urta polislari va  ushbu xizmatni amalga oshirishning  tarkibiy qismi bo'lgan  sug'urta sertifikati berildi.

- Bizning kompaniya “O'zbekiston havo yo'llari” talablariga  muvofiq, nisbatan   qulay  xizmat  taklif qilganligi uchun  milliy aviakompaniya tenderida yutib chiqdi, - deydi “O'zbekinvest” EIMSK ning  Tavakkallarni boshqarish va qayta sug'urta departamenti katta anderrayteri Anvar Umarov. - Bu boradagi qarorning qabul qilinishida  nafaqat  eng qulay stavkalarning taklif etilganligi, balki “O'zbekinvest” ning tajribasi ham muhim rol o'ynadi. “O'zbekinvest” 20 yil davomida   O'zbekiston sug'urta bozorida  ishonchli hamkor ekanligini namoyon qildi.    Yana shuni qo'shimcha qilish mumkinki,  bizning kompaniya “O'zbekiston havo yo'llari”ga birinchi marta sug'urta qoplamasini taklif etayotgani yo'q.  “O'zbekinvest”  milliy aviakompaniyaga 2002, 2003 va 2004 yillarda ham huddi shunday sug'urta xizmatini ko'rsatgan.

Ta'kidlash kerakki,  aviakompaniya parki ikkiga bo'lingan. Bular  G'arbiy  flot va Sharqiy flot. G'arbiy flot Boing  va  Airbus laynerlarini  o'z ichiga oladi va ular alohida sug'urtalanadi.

- Aviatsiya xatarlari bo'yicha ikki kompaniya o'rtasida imzolangan shartnoma  1 yilga mo'ljallangan, - deya ta'kidladi Anvar Umarov. -  Unga ko'ra, 15 iyuldan boshlab G'arbiy flot va 12 iyuldan Sharqiy flot sug'urtasi shartnomasi  kuchga kirdi.

Albatta,  sug'urta majburiyati   juda katta. Shu bois, “O'zbekinvest” kompaniyasi o'z zimmasiga olgan  xatarni   qayta sug'urtalashi talab etiladi. Bu   qayta sug'urta brokeri orqali  amalga oshirildi va  tavakkalning ma'lum bir qismini London bozoridagi  anderrayterlar o'z zimmasiga oldi.

 “O'zbekinvest” EIMSK ning asosiy e'tibori “O'zbekiston havo yo'llari” milliy aviakompaniyasi bilan erishilgan kelishuvni  samarali amalga oshirish hamda kelgusida ham  havo laynerlari sug'urtasi bo'yicha hamkorlikni  davom ettirishga  qaratilgan.